2026 жылғы 7 қыркүйектен бастап БЖЗҚ салымшылары міндетті зейнетақы жинақтарының 100%-ға дейінгі бөлігін жеке инвестициялық портфельді басқарушыларға сенімгерлік басқаруға бере алады. Бұл өзгеріс міндетті зейнетақы жарналары және міндетті кәсіптік зейнетақы жарналары есебінен қалыптастырылған қаражатқа қатысты.
Не өзгереді
7 қыркүйекке дейін қолданыстағы шектеу сақталады: міндетті зейнетақы жинақтарының 50%-ға дейінгі бөлігін басқаруға беруге болады, ал ерікті жарналарды толық көлемде аударуға рұқсат етіледі.
7 қыркүйектен бастап лимит 100%-ға дейін ұлғаяды. Бұл салымшыларға инвестициялық стратегия мен басқарушы компанияны таңдауда көбірек мүмкіндік береді.
Жинақтарды басқаруға қалай беруге болады
Қаражатты беру үшін:
- БЖЗҚ тізілімінен басқарушы компанияны таңдау қажет.
- Электрондық цифрлық қолтаңбаны (ЭЦҚ) пайдалана отырып, жеке кабинет арқылы немесе БЖЗҚ-ның кез келген бөлімшесінде өтініш беру қажет.
Басқарушы компаниялардың кірістілігі, басқаруындағы активтер көлемі және инвестициялық портфельдерінің құрылымы туралы ақпарат зейнетақы активтерін инвестициялық басқару платформасында ай сайын жарияланады.
Өтініш берілгеннен кейін оның мәртебесін жеке кабинет немесе БЖЗҚ-ның мобильді қосымшасы арқылы бақылауға болады.
Нені ескеру қажет
Шешім қабылдамас бұрын бірнеше маңызды жайтқа назар аударған жөн:
- кірістілік басқарушы компанияның инвестициялық стратегиясына байланысты және оған кепілдік берілмейді, сондай-ақ әртүрлі стратегиялар бойынша тәуекел деңгейі де әртүрлі болуы мүмкін;
- басқарушы компанияның сыйақысы алынған инвестициялық кірістің 7,5%-ынан аспайды;
- зейнетақы жинақтарын Ұлттық Банктің басқаруына қайта беру екі жылдан ерте жүзеге асырылмайды.
Бұл ретте жинақтарды басқаруға беру БЖЗҚ-дан шығуды білдірмейді. Қаражатты кім басқаратынына қарамастан, БЖЗҚ зейнетақы жинақтарының есебін жүргізуді және жеке зейнетақы шоттарына қызмет көрсетуді жалғастырады. Егер басқарушы компания тізілімнен шығарылса, жинақтар Ұлттық Банктің басқаруына қайтарылады.
