Қазақстан Республикасы Қаржы министрінің міндетін атқарушының 2026 жылғы 30 наурыздағы бұйрығымен бухгалтерлік есеп жүргізу қағидаларына өзгерістер мен толықтырулар енгізілді.
Жаңартылған редакцияға сәйкес бухгалтерлік қызметті басқару бас бухгалтерге немесе бухгалтерлік есепті жүргізуге, қаржылық есептілікті дайындауға және ұсынуға, сондай-ақ есеп саясатын қалыптастыруға жауапты өзге де уәкілетті тұлғаға жүктеледі.
Бастапқы құжаттарға түзетулер енгізу тәртібіне қосымша талаптар белгіленді. Атап айтқанда, кассалық және банктік бастапқы құжаттарға түзетулер енгізуге жол берілмейді. Басқа бастапқы құжаттарға түзетулер тек операцияға қатысушылардың келісімімен енгізіліп, түзету енгізілген күнді көрсете отырып, сол құжаттарға қол қойған тұлғалардың қолдарымен расталуы тиіс.
Электрондық құжаттарға қатысты жеке тәртіп көзделген. Қателерді түзету жаңа түзетілген бастапқы құжатты қалыптастыру арқылы жүзеге асырылады, онда түзетудің нөмірі мен күні, сондай-ақ бастапқы құжатқа (нөмірі мен күні) сілтеме көрсетіледі. Мұндай құжатта «түзетілді» белгісі қойылып, бастапқы құжатқа қол қойған тұлғалар қайта қол қоюы тиіс. Бұл ретте бастапқы электрондық құжат «күші жойылған» мәртебесімен сақталуы қажет.
Бұйрық 2026 жылғы 20 сәуірден бастап қолданысқа енгізіледі.
Zakon.kz материалдары негізінде.
